Bilwi bara Waspam bilara mani pyuara kakau swaki saki ba “Yukuwanka ba paramra sakanka”

Yahbra kati luan ba wina li âpu laptika 40 karnika ulanka pitkara tingni, li unhta nani ba sin  lâwan, kakau dusa mangkan nani ba mapara bara indian tawanka sirpi nani Bilwi bara Waspam tanira 30 upla nani kakau mangki sasakra nani mapara mayuhkanka daukisa.

Naha mani na kasak lapta karna pali sa, ba taka indian tawan sirpi nani ba sibrin binka kum kangban sa, kakau nasla nani ba tiwaiara wabia pali sa. Mangki sakaia tanka ba wan almuka pyua wina wan tnatka baku kulkan sa, pamali ailal mapara lalah lainkara tâ baikra tara yabisa.

Kakau ba dus mâ nani mangki sakaia tilara sa, lalah lainkara wan tâ baikra daukisa bara pamali banira plun piyaia bara wark bilaika nani sin yabisa, Emilio Hammer, witin 63 mani waitnika Sumu bila tasba pri Bilwi tasbaika putka tani wina ba,   bui tanka wan wisa.

Kakau ba sin prari aima aima wan tasbaika baiki sakanka ra pruki  ba mapara, kan kahbanka smatka kum baku sa. Witin dusa nani ba bak sakan kumika sa, wan tawanka sirpi nanikku prari pruki lui wi ba tilara dus tara nani sin batakan sa, wisa.

Baku sin tat nani saki sa. “Nanara yawan yulu bara sua dusa, nani sin âpu sa, witin dusa nani ba kabu purara wark takaia tâ baikra sa, utla makaia, baku sin kapin nani paskaia sin” mangki sasakra ba baku pali aisan kata.

Siknis tara mapara sikatara nani. Kakau magnki sasakra ba diara “yukuwanra” bara ba param ra sakan sa, inma kukanka ba kan kahbanka daukaia. Naha satka warkka dauki tâ bri kakaira ba, bara  warkka nikbi buki aslika NICACAO maki ba, tasba ba li bri kabia dukiara bara lapta karna pali alki ba mapara kan kahban  smaltak raya nani alki daukan sa.

“Yukukanra” bara ba sika yamhpus karna, sal satka aikuki krauhbi yula nani kau takras ba kainara li wal srikbanka nani daukisa.

Josué Isaías Pérez, NICACAO wakka tanka brabrira lama kat ba, bila smatka kum bak sakan ba sika inma magkan ba munhta daukaia apia bara klin sin daukai apia, dista dusa nani ba sin ban bara kaia sa, baku sin dipasta almuk nani ba sin, tasba ba buswan bri kaia bara sîka nani srikban ba karnika ban bri kaia dukiara kan kahbisa.

Tasba disan kabia  dukiara pata satka nani yabi  yamhpus karna, plun yuya damni nani ba , nanara yu 5 matsip nani bani dauki kaia sa, bara yu 15 ( matawal sip pura matsip) ninkara sal talika ba yaban kaia sa. Inma mangkan ba li ban bri kabia dukiara naha diara nani kainara aisan ba, lapta karna pyuara kasak yamni kulkan sa.

Sins lâka aisanka kumra wisa “ diara yukuwanra suni swin apusa upla kum diara sut kakaira  ba mapara” Bilwi bara Waspam tasbaikara tnatka nani yus munan ba tawan sirpi mapara baha pali ba wahbi sakanka kum baku takan sa, bara sin wark tatakra nani aslika mapara bara wark wala nani daukai pyua ra lan takaia bilaika kum baku sa.

Kul manka ulanka tara pali BICU (Bluefields Indian & Caribbean University), kulka tuktan nani inma, dus nani dukiara tadi muni mapara Hammer kakau mangkan dahra ba, ai praptikara lan takanka  yabisa.

Emilio Hammer dahra ba  kakau mangki sasakra wala nani ba sin kan sasunra bara baha dukiara uplika nani sa. Ban sakuna wan kaina kirra bara lalah lainkara aiklabi pura luaia lukanka ba, naha mairin waitna nani wan iwanka tnatka nani, ya pali ba paramra sakaia dukiara kan sunaia bara kau raya bri kaia dukiara ai mamna lulkisa.